Kremlin məşhur qeyri-rusları

Rusiyanın azərbaycanlı Milli Qəhrəmanı, çeçen spikeri, tatar naziri, yapon deputatı...

Bütün tarixi boyunca çoxmillətli və çoxdinli ölkə olan Rusiya tarixində qeyri-rus əsilli fiqurların – siyasətçilərin, elm xadimlərinin böyük xidmətləri var. İstər Rusiya İmeriyası, istər SSRİ, istərsə də müasir Rusiya Federasiyasında əsas olan rus amili ilə paralel, qeyri-rus faktoru da önəmli rol oynayıb.

Modern.az saytı müasir Rusiya dövlətində önəmli postlar tutmuş qeyri-rus siyasətçilərinin, elm xadimlərinin siyahısını təqdim edir.

Ruslan İmranoviç Xasbulatov milliyətcə çeçen siyasi xadimdir. 1991-ci ildən 1993-cü ilə qədər Rusiya Ali Sovetinin sədri olub.

Mənşəcə başqırd olan Elvira Sapihzadovna Nabiullina hazırda Rusiya Mərkəzi Bankının sədridir. O 2007-2012-ci illərdə iqtisadi inkişaf naziri və Rusiya prezidentinin köməkçisi vəzifəsində çalışıb.

Rəşid Qöməroviç Nurqaliyev milliyətcə tatardır. O, 2004-2012-ci illər ərzində Rusiya daxili işlər naziri postunu tutub. Hazırda Təhlükəsizlik Şurası katibinin müavini vəzifəsində çalışır.

İrina Muçuovna Xakamada rus Nina Sinelnikova və yapon kommunisti Muçuo Xakamadanın ailəsində doğulub. 1994-2003-cü illərdə Rusiya Dövlət Dumasının deputatı, 2000-2003-cü illərdə isə Dövlət Duması sədrinin müavini vəzifəsini icra edib. Hazırda Rusiya Xarici və Müdafiə Siyasəti Şurasının üzvü və radio-televiziya aparıcısı kimi fəaliyyət göstərir.

Azərbaycanlı Tahir Teymur oğlu Salahov isə Rusiya Rəssamlar İttifaqının vitse-prezidentidir. 85 yaşlı məşhur soydaşımız 2012-ci ildə Rusiya Dövlət Mükafatına da layiq görülüb.

Daha bir soydaşımız Davud Hüseyn oğlu Paşayev Rusiya Atom Gəmiqayırması Mərkəzinin prezidentidir. O, iki dəfə Dövlət Mükafatı laureatı və 1995-ci ildə Rusiyanın Milli Qəhrəmanı fəxri adları ilə təltif olunub. D.Paşayev 2009-cu ildə dünyasını dəişib.

Erməni milliyətindən olan vitse-admiral Sergey Avakyanç 2012-ci ilin mayından Rusiya Sakit Okean Donanmasının komandanıdır.

Rusiyanın mülki və hərbi aviasiya sahəsindəki aparıcı şirkəti – “Suxoy” Açıq Səhmdar Şirkərinin prezidenti əslən Dağlıq Qarabağ ermənisi olan Mixail Poqosyandır.

Alan Qumiroviç Tuleyev 1997-ci ildən bəri Rusiyanın Kemerovo vilayətinin qubernatorudur. Onun atası milliyətcə qazax, anası isə tara-başqırd əsillidir.

Milliyətcə avar olan Ramazan Abdulatipov hazırda Dağıstan Muxtar Respublikasının rəhbəridir. O, 2013-cü il yanvarın 28-dən bu postu icra edir. Abdulatipov bundan öncə 1997-1998-ci illərdə Rusiya baş nazirinin müavini, 1998-ci ildən 1999-cu ilə qədər milli siyasət naziri postlarında çalışıb. Dağıstana rəhbər təyin olunana qədər isə Rusiyanın Tacikistandakı səfiri, Rusiya Mədəniyyət və İncəsənət Universitetinin rektoru və Dövlət Dumasının deputatı kimi müxtəlif sahələrdə çalışıb.